Xəbərlər

Azərbaycan Əmanətlərin Sığortalanması Fondunda 20 Yanvar faciəsinin 31-ci ildönümü qeyd edilib

19 Yan 2021

Azərbaycan Əmanətlərin Sığortalanması Fondunda 20 Yanvar şəhidlərinin xatirəsi anılıb. 20 Yanvar faciəsinin 31-ci ildönümünə həsr olunmuş tədbirdə çıxış edən Fondun Daxili Audit xidmət rəisi Orxan Hüseynov 20 Yanvar faciəsinin istiqlal tariximizin ən qanlı səhifələrindən biri olduğunu bildirib.  Qeyd edib ki, 20 Yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilməmişdir. Həmçinin O, öz çıxışında qeyd edib ki, faciədən bir gün sonra ulu öndər Heydər Əliyev Azərbaycanın Moskvadakı daimi nümayəndəliyinə gələrək xalqımızın kədərini bölüşmüş, SSRİ rəhbərliyinin ölkəmizdə həyata keçirdiyi qanlı cinayəti bütün dünyaya bəyan etmişdir. Azərbaycan rəhbərliyinə qayıdışdan sonra Heydər Əliyevin təşəbbüsü ilə 1994-cu ilin yanvar ayında Milli Məclisdə faciəvi 20 Yanvar hadisələrinə siyasi qiymət verilmişdir. Bir vaxtlar  dünyanın quru hissəsinin  altı da bir hissəsinə hökmranlıq edən nəhəng  Sovet imperiyasına qarşı çıxan Azərbaycan xalqı heçnədən çəkinmədən öz mübarizliyini, əyilməzliyini, məğrurluğunu nümayiş etdirmişdir. Keçmiş SSRİ rəhbərliyi tərəfindən Azərbaycan xalqının demokratiya və milli azadlıq uğrunda mübarizəsini boğmaq məqsədilə 1990-cı il yanvarın 19-dan 20-ə keçən gecə Bakıda görünməmiş vəhşiliklər törədilmişdir. Bu vəhşiliklər nəticəsində Bakıda və Respublikanın rayonlarında 133 nəfər öldürülmüş, 744 nəfər yaralanmış, 841 adam qanunsuz olaraq həbs edilmiş, 5 nəfər itkin düşmüşdür. Sovet Ordusunun həmin gün Azərbaycan xalqına qarşı həyata keçirdiyi hərbi təcavüz insanlığa qarşı törədilmiş ən ağır cinayətlərdən biri kimi tarixdə qalacaqdır.